Teymið
Langbrók var stofnað í lok árs 2020 og veitir stjórnendum ráðgjöf á sviði stefnumótunar, sjálfbærni, áhættustýringar og samskipta. Ráðgjöfin tengir ábyrgan rekstur og langtímaverðmætasköpun við uppbyggingu trausts, ímyndar og samkeppnishæfni.
Vinnan byggir á greiningu á tækifærum, áskorunum og áhrifum starfseminnar á efnahag, samfélag og umhverfi. Með mikilvægisgreiningu og samtali við stjórnendur, starfsfólk og aðra hagaðila eru mótaðar áherslur sem verða hluti af heildarstefnu fyrirtækisins. Langbrók aðstoðar við að innleiða þær með skýrum markmiðum, aðgerðum, ábyrgð og mælikvörðum, með hliðsjón af alþjóðlegum stöðlum á borð við ESRS, GRI og viðeigandi ISO-staðla. Markmiðið er að efla gæðastýringu, draga úr áhættu og styrkja seiglu fyrirtækja.
Langbrók veitir jafnframt ráðgjöf í breytingastjórnun, hagaðilasamskiptum, almannatengslum, kynningar- og markaðsmálum. Stefna, aðgerðir og árangur mynda þannig grunn að trúverðugri miðlun og skýrri stöðu fyrirtækja og vörumerkja.
Heiðarleiki, hugrekki og skapandi hugsun eru leiðarljós ráðgjafarinnar. Áhersla er lögð á að breyta greiningu í aðgerðir og sýnilegan árangur sem styður við ábyrga starfsemi, verðmætasköpun og traust til framtíðar.
Langbrók vinnur með stjórnendum fyrirtækja í stefnumörkun og innleiðingu samfélagsábyrgðar og samfélagsskýrslugerðar. Hugmyndafræðin byggir á að auka sjálfbærni í starfseminni og efla samkeppnishæfni. Unnið er með eftirfarandi mælikvarða: UN Global Compact, European Sustainability Reporting Standards (ESRS) Global Reporting Initiative (GRI), ESG/UFS og Heimsmarkmið Sameinuðu þjóðanna (SDG).
Langbrók hefur unnið með leiðandi fyrirtækjum og stofnunum í ýmsum geirum líkt og Landsneti, Alcoa Fjarðaáli, Norðuráli, 66°Norður, Landsvirkjun, Sýn, Icelandair, Hörpu, Valitor, Umhverfis og Orkustofnun, Kötlu og embætti landlæknis. Langbrók hefur unnið fyrir innlend og alþjóðleg félagasamtök líkt og Women Political Leaders, Festu miðstöð um samfélagsábyrgð, IAOF, Samráðsvettvang um aukna hagsæld og fleiri aðila.
Soffía S. Sigurgeirsdóttir og Bára Mjöll Þórðardóttir eru eigendur Langbrókar og hafa víðtæka reynslu í stefnumótun og breytingastjórnun á sviði samfélagsábyrgðar, almannatengsla, markaðs- og kynningarmála.
Soffía S. Sigurgeirsdóttir er stofnandi og framkvæmdastjóri Langbrókar. Soffía hefur um árabil starfað sem stjórnendaráðgjafi fyrir innlend og alþjóðleg fyrirtæki, stofnanir og félagasamtök. Ráðgjöf hennar miðar að því að efla sjálfbærni og ábyrgð í starfsemi og tengja þær áherslur við heildarstefnu, áhættustýringu og langtímaárangur. Hún aðstoðar fyrirtæki við að greina tækifæri, áskoranir og áhrif starfseminnar á efnahag, samfélag og umhverfi. Á grunni mikilvægisgreiningar vinnur hún með stjórnendum að stefnumótun og innleiðingu markmiða, aðgerða og mælikvarða, með hliðsjón af alþjóðlegum stöðlum á borð við ESRS, GRI og viðeigandi ISO-staðla. Áhersla er lögð á að styrkja stjórnun, efla gæði og draga úr áhættu.
Soffía hefur jafnframt víðtæka reynslu af almannatengslum, breytingastjórnun, kynningar- og markaðsmálum. Hún tengir þannig stefnu og árangur fyrirtækja við skýra og trúverðuga miðlun sem styður við ímynd þeirra og traust hagaðila. Hún hefur leitt innleiðingu árs- og sjálfbærni og skýrslugerðar hjá fjölmörgum fyrirtækjum, stýrt vinnustofum og rýnihópum og leitt samtal og samstarf við hagaðila. Til fjölda ára hefur hún sinnt þjálfun í fjölmiðlasamskiptum fyrir leiðandi fyrirtæki. Soffía hefur áralanga reynslu í krísustjórnun.
Soffía starfaði áður hjá KOM ráðgjöf, þar áður starfaði hún sem framkvæmdastýra Landsnefndar UN Women á Íslandi, í starfi sínu kom hún meðal annars á Hvatningaverðlaunum jafnréttismála. Soffía starfaði í 10 ár í fjármálageiranum sem sérfræðingur í almannatengslum og samfélagsábyrgð hjá Landsbankanum, sem framkvæmdastjóri fjárfestatengsla og markaðsmála hjá Spron og sem forstöðumaður markaðsmála hjá Sambandi sparisjóða.
Soffía er með M.Sc. í alþjóðasamskiptum frá London School of Economics og B.A. í sálarfræði frá Háskóla Íslands. Hún lagði jafnframt stund á heimspekinám við HÍ. Soffía er með vottun frá Global Reporting Initiative (GRI) í skýrslugerð um samfélagslega ábyrgð fyrirtækja.
Soffía hefur stundað íþróttir frá unga aldri og nýtur fjölbreyttrar útivistar og fjallamennsku. Hún hefur jafnframt unnið að góðgerðarmálum um árabil. Hún stóð fyrir góðgerðarverkefninu Climb for Change, þar sem gengið var á Lobuche í Himalajafjöllum til styrktar nepölskum fjallgöngukonum og auknum tækifærum þeirra innan fjallamennsku. Hún er ein af stofnendum góðgerðarfélagsins Lífskrafts. Á þeim vettvangi hefur hún ásamt Snjódrífunum þverað Vatnajökul og staðið að göngu 130 kvenna á Hvannadalshnúk til styrktar krabbameinstengdum verkefnum. Soffía sat í stjórn ABC barnahjálpar í sjö ár og í stjórn UN Women á Íslandi í átta ár.
Bára Mjöll Þórðardóttir er meðeigandi og stjórnendaráðgjafi hjá Langbrók. Hún hefur áralanga reynslu á sviði stefnumörkunar, markaðs- og samskiptamála, jákvæðrar forystu, breytingastjórnunar, viðburðastjórnunar, samfélagsábyrgðar og sjálfbærni sem stjórnandi, ráðgjafi og sérfræðingur.
Áður en Bára Mjöll gekk til liðs við Langbrók starfaði hún við rekstrar- og markaðsráðgjöf sem fól m.a. í sér mörkun, stefnumótun, breytingastjórnun og endurskipulagningu. Hún starfaði um árabil á sviði markaðs- og samskiptamála bæði á íslenskum neytendamarkaði sem og erlendum mörkuðum. Hún starfaði sem upplýsingafulltrúi hjá Bláa Lóninu og sem forstöðumaður markaðs- og samskiptamála hjá Vodafone og Stöð 2 (Sýn hf.) Bára Mjöll starfaði í fjármálageiranum í 18 ár, m.a. sem markaðsstjóri hjá S24 og sérfræðingur á samskiptasviði Arion banka þar sem hún sinnti meðal annars fjárfestatengslum og vann að stefnumótun í samfélagslegri ábyrgð.
Bára Mjöll er með B.Sc. í viðskiptafræði frá Háskólanum í Reykjavik, ásamt löggildingu í verðbréfamiðlun. Hún lagði auk þess stund á M.Sc. nám í viðskiptafræði við Háskóla Íslands og hefur lokið diplómanámi á meistarastigi í jákvæðri sálfræði frá Háskóla Íslands. Bára Mjöll er viðurkenndur stjórnarmaður frá Akademías.
Bára Mjöll hefur mikinn áhuga á útivist, hreyfingu, heilbrigði og ferðalögum og þykir fátt skemmtilegra en að skella sér í utanvegahlaup, fjallgöngur og á skíði. Hún hefur ferðast víða en það sem stendur upp úr eru ferðalög hennar til Nepal þar sem hún gekk m.a. í grunnbúðir Annapurna og langleiðina í grunnbúðir Everest þar sem hún varð heilluð af landi og þjóð.
Bára Mjöll hefur sinnt góðgerðarmálum um árabil, hún er ein af stofnendum góðgerðarfélagsins Lífskrafts og situr einnig í stjórn Lífs styrktarfélags.